Aşgabatda Türkmenistanyň Garaşsyzlygynyň 35 ýyllygy mynasybetli “Ynsanperwerlik ýoly” ady bilen halkara maslahat geçirildi

2026-njy ýylyň 26-njy martynda “Arçabil” myhmanhanasynda Türkmenistanyň Garaşsyzlygynyň 35 ýyllygy mynasybetli “Ynsanperwerlik ýoly” ady bilen halkara maslahat geçirildi.

Halkara maslahata Türkmenistanyň Gyzyl Ýarymaý Milli jemgyýetiniň (TGÝMJ), Halkara Gyzyl Haç Komitetiniň we Gyzyl Haç hem-de Gyzyl Ýarymaý jemgyýetleriniň halkara federasiýasynyň Türkmenistandaky wekilhanalarynyň ýolbaşçylary, dürli ýurtlaryň Gyzyl Ýarymaý Milli jemgyýetleriniň wekilleri sanly ulgam arkaly gatnaşdylar. Forumda häzirki döwürde möhüm häsiýete eýe bolýan ynsanperwer ýörelgeleriň many-mazmuny barada gürrüň edildi.

Çärede dünýä ýurtlarynyň Gyzyl Ýarymaý Milli jemgyýetleri, Halkara Gyzyl Haç Komitetiniň we Gyzyl Haç hem-de Gyzyl Ýarymaý jemgyýetleriniň halkara federasiýasy bilen ýola goýlan hyzmatdaşlygyň ugurlary ara alnyp maslahatlaşyldy. Bu guramalar bilen alnyp barylýan bilelikdäki işler Türkmenistanyň Gyzyl Ýarymaý Milli jemgyýetiniň işgärleriniň we meýletinçileriniň bilim derejesini ýokarlandyrmaga, özara tejribe alyşmaga şert döredýär.

Çykyşlarda bellenilişi ýaly, TGÝMJ-niň alyp barýan işleri Gyzyl Haç we Gyzyl Ýarymaý jemgyýetleriniň halkara federasiýasynyň ynsanperwerlik, özygtyýarlylyk, meýletinlik ýaly esasy ýörelgelerine laýyk gelýär. Bu bolsa kabul edilen çözgütleriň ýokary derejede amala aşyrylmagy ugrundaky bilelikdäki tagallalaryň aýdyň netijesidir.

Foruma gatnaşyjylar häzirki döwrüň wajyp meselelerini öz içine alan çäräniň ýokary guramaçylyk derejesiniň üpjün edilendigi üçin Prezident Serdar Berdimuhamedowa we türkmen halkynyň Milli Lideri, Türkmenistanyň Halk Maslahatynyň Başlygyna çuňňur hoşallyklaryny beýan etdiler. Şeýle-de olar meýilleşdirilen çäreleriň häzirki zaman talaplaryna laýyk derejede amala aşyrylmagy ugrunda bilelikdäki tagallalaryny gaýgyrmajakdyklaryna ynandyrdylar.