Buharestiň Milli Ylym we Tehnologiýa POLITEHNIKI uniwersiteti bilen Türkmenistanyň Oguz han adyndaky Inžener-tehnologiýalar uniwersitetiniň arasynda özara düşünişmek hakyndaky Ähtnama gol çekildi.

Türkmenistanyň Oguz han adyndaky Inžener-tehnologiýalar uniwersitetinde geçirilen “Akylly şäher: Dolandyryş, sanly, akylly we emeli intellekt tehnologiýalary” atly halkara ylmy we amaly konferensiýasynyň çäklerinde geçirlen Ähtnama gol çekişlik dabarasyna rumyn tarapyndan wideoaragatnaşyk arkaly Buharestiň Milli Ylym we Tehnologiýa POLITEHNIKI uniwersitetiniň rektorynyň orunbasary Horiýa Nekulanyň gatnaşdy.

Gol çekilen Ähtnama esaslanyp, taraplar bilelikde ylmy-barlag we işlӓp düzme taslamalaryny amal etmäge, leksiýalary, simpoziumlary, halkara maslahatlaşmalary, ylmy maslahatlary we seminarlary guramaga; ylmy işgärleriň we talyplaryň alyş-çalşygyny ýola goýmaga; okuw meýilnamalary we ylmy makalalary boýunça bilelikde işleşmäge; professorlara we ylmy işgärlere leksiýa geçmäge mümkinçilikleri döretmäge; okatmakda innowasion çemeleşmeleri girizmek we ösdürmek üçin tejribe paýlaşmaga mümkinçilikleri bolar. Mundan başga-da, professorlaryň, mugallymlaryň, hünärmenleriň we ýaş alymlaryň gözleg netijelerini halkara ykrar edilen ylmy žurnallarda bilelikde neşir etmek meýilleşdirilýär.

Buharestiň Milli Ylym we Tehnologiýa POLITEHNIKI uniwersiteti bilen Türkmenistanyň Oguz han adyndaky Inžener-tehnologiýalar uniwersitetiniň arasynda ylym we bilim pudagynda netijeli hyzmatdaşlyk birnäçe ýyl bäri üstünlikli alnyp barylýar.